Saturday, August 23, 2008

હવે વિનોદની નજરે અમેરિકા?

અમેરિકામાં ભરાનારા ગુજરાતીઓના મેળાવડા માટે વિનોદ ભટ્ટ 27 ઓગસ્ટના રોજ ત્રણ અઠવાડિયાં માટે ‘ત્યાં’ જઇ રહ્યા છે. આમ તો ‘ત્યાંએચ્છુકો’- અમેરિકા જવા માટે વીઝા લેવા ગયેલા લોકો-ની સંખ્યા બહુ મોટી હતી, પણ કોન્સુલેટે રાબેતા મુજબ કેટલાકને વીઝા આપ્યા ને ઘણા બધાને ન આપ્યા.
એક કવિને ઇન્ટરવ્યુમાં પૂછવામાં આવ્યું,’શું કરો છો?’ જવાબ મળ્યો, ‘કવિતા’. એટલે અફસરે તેમને કવિતા સંભળાવવા કહ્યું અને સાંભળ્યા પ્રમાણે, કવિતા સાંભળીને તેમની વીઝાઅરજી ‘રીજેક્ટ’ કરી દીધી. એક તસવીરકાર મિત્રને ‘ત્યાં ફોટોગ્રાફરો નથી તે તમારે છેક અહીંથી જવું પડે છે?’ એમ કહીને રીજેક્ટ કર્યા. એક કવિને આયોજકો બોલાવવા ઇચ્છતા હતા, પણ કવિએ સજોડે આવવાનો આગ્રહ રાખ્યો. આયોજકોએ કહ્યું, ‘તમારી ત્રણ કવિતા માટે ત્રણ લાખ? કવિતા દીઠ લાખ રૂપિયા બહુ વધારે કહેવાય.’

કોન્સુલેટમાં વિનોદભાઇને પણ થોડા આડાઅવળા સવાલો પૂછ્યા. તબિયતનાં કારણોસર અમેરિકા જવાની તાલાવેલી ન ધરાવતા વિનોદભાઇએ સવાલો જેવા જ આ઼ડાઅવળા જવાબો આપ્યા. દા.ત. ’કેમ અમેરિકા જાવ છો?’ વિનોદભાઇનો જવાબઃ ‘ત્યાં મોટી સંખ્યામાં વસતા ગુજરાતીઓને મળવા. આ સંમેલન ચીન કે જાપાનમાં ભરાયું હોત તો ત્યાં પણ જાત.’ બે-ચાર સવાલો પછી અકળાયેલા વિનોદબાબુએ એક સવાલના જવાબમાં ગુજરાતી અનુવાદીકાને ’તું ગુજરાતી હોવા છતાં તે મારું નામ નથી સાંભળ્યું, તેની તને શરમ આવવી જોઇએ.’ એ મતલબનું કંઇક સંભળાવ્યું. એટલે છોભીલી પડેલી અનુવાદિકાએ અમેરિકન સાહેબને કહ્યું,’હી સીમ્સ ટુ બી એ રીનાઉન્ડ રાઇટર, ધો આઇ હેવ નોટ હર્ડ હીઝ નેમ.’
‘એકલા જવું છે?’ એવા સવાલના જવાબમાં વિનોદભાઇએ ગુજરાતી અનુવાદીકાને બાજુ પર રાખીને અમેરિકનને કહ્યું,’આઇ હોપ, યુ ડોન્ટ એન્વી મી.’ અને અમેરિકન અફસર હસી પડ્યો. વીઝા ગ્રાન્ટેડ.
વિનોદ ભટ્ટ ત્રણ અઠવાડિયાં માટે અમેરિકા જાય, એટલે આપણો સ્વાર્થ ‘વિનોદની નજરે’ અમેરિકા વિશે વાંચવા મળે, એ જ રહે છે. બે દિવસ પહેલાં અમારી રાબેતા મુજબની ગપ્પાંગોષ્ઠિ બેઠકમાં વિનોદભાઇએ ચોપડી લખવાની ઇચ્છા તો વ્યક્ત કરી. સાથોસાથ, તબિયતના કારણે ‘હજુ અમેરિકા જવાનું ન થાય તો સારું’ એવું પણ થતું હોવાનું અડધી મજાકમાં અને અડધી ગંભીરતાથી કહ્યું.

અમેરિકામાં વિનોદભાઇ પ્રવચનો આપશે અને હરશેફરશે. પહેલી અમેરિકાયાત્રાથી હેમખેમ પાછા ફરીને વિનોદભાઇ મજાનું પુસ્તક આપે એવી શુભેચ્છા.

1 comment:

  1. Anonymous11:35:00 AM

    આ કવિતા સંભળાવીને રિજેક્ટ થયેલા કવિ કોણ છે? ;)

    ReplyDelete