Thursday, September 08, 2011
નવી, મસ્તીભરી શરૂઆત : 'ફેકન્યૂઝ' ઉર્ફે સાંપ્રત ઘટનાઓની 'પટ્ટી', અંગ્રેજી સમાચાર-સ્વરૂપે
આસપાસ બનતી ઘટનાઓ વિશે ફક્ત ગંભીર લખવાથી ઘણી વાર, ઘણું કહેવાનું બાકી રહી ગયાની લાગણી રહેતી હોય છે. હળવા લેખન માટે અઠવાડિક કોલમ 'બોલ્ચુંચાલ્યું માફ' (ગુજરાત સમાચાર, શતદલ પૂર્તિ, બુધવાર) છે. પણ તેમાં 'ન્યૂઝી' કહેવાય એવી સામગ્રી માટે બહુ અવકાશ હોતો નથી અને ઇચ્છા પણ હોતી નથી.
એવું શું કરી શકાય કે જેનાથી સાંપ્રત ઘટનાઓ વિશે માર્મિક, વ્યંગાત્મક ટીપ્પણી, અઠવાડિક ચક્કરની રાહ જોયા વિના, કરી શકાય? એ વિચારતાં, ગંભીર સમાચાર-શૈલીમાં કાલ્પનિક સમાચાર લખવાનું મન થયું. 10-11 વર્ષ પહેલાં theonion.com જેવી વેબસાઇટ જોઇ ત્યારે થયું હતું કે આ બહુ સરસ છે (અને કરવા જેવું પણ ખરૂં.) છેવટે તેનો વારો આવી ગયો- અને એ નિમિત્તે જાહેર જીવનનાં ઘણાં પાત્રોનો વારો વ્યંગાત્મક રીતે નીકળવાનો છે.
Originally Fake એવું નામ ધરાવતા મારા નવા બ્લોગનું સરનામું છેઃ faketake.blogspot.com. (ફેસબુકના મારા પ્રોફાઇલ પર faketake નામે પેજ પણ મુક્યું છે, જેમાં હવેથી બ્લોગ પર મુકાનારા તોફાની સમાચાર જોઇ શકાશે.) બ્લોગના વિષયો અને તેમાં કરેલી મસ્તી સ્થાનિકથી માંડીને રાષ્ટ્રિય-આંતરરાષ્ટ્રિય બાબતો અંગેનાં છે અને રહેવાનાં. દેખીતી રીતે આ સમાચારો પૂરેપૂરા કાલ્પનિક હશે, પણ ખરૂં જોતાં તેમાં સમાચારોનું કેરિકેચરિંગ કરવાનો આશય છેઃ મૂળ અર્કમાં તથ્યનો અંશ તો હોય જ, પણ તેને સાવ બીજા છેડે ખેંચીને ગમ્મત થઇ હોય અને એ રીતે સંબંધિત પાત્રોની કેટલી લાક્ષણિકતાઓને અતિશયોક્તિના માધ્યમથી અંજલિ અપાય.
બનાવટી સમાચારોનું કદ પણ સમાચાર જેટલું (નાનું). એટલે આ બ્લોગ સંપૂર્ણપણે અંગ્રેજીમાં લખવાનો પ્રયોગ કર્યો છે. હા, આખો બ્લોગ અંગ્રેજીમાં લખવાને તો 'પ્રયોગ' જ કહેવાય.
આ બ્લોગ ખુલ્લાશથી હસી શકતા અને સાબૂત સેન્સ ઓફ હ્યુમર ધરાવનારા લોકો માટે છે. પક્ષીય હિતો ધરાવનારા લોકો સામા પક્ષની ખીંચાઇ વખતે હસે, એટલું જ પોતાના પક્ષની ફિલમ ઉતરતી હોય ત્યારે પણ હસી શકે, તો તે લખાણની મઝા લઇ શકશે. બાકી, હાસ્યલેખોમાં 'ગંભીર' (અને ખરેખર તો હસવું આવે એવી) રાજકીય ચર્ચા પર ઉતરી જનારા મિ્ત્રોને બ્લોગની સામગ્રી બહુ અનુકૂળ નહીં આવે. બ્લોગના '(ઓ)મિશન સ્ટેટમેન્ટ'માં લખ્યું છે તેમ, 'નીતાંત મૌલિક-કાલ્પનિક એવા આ સમાચાર વાંચીને લાગણી દુભાવનારે પોતાના હિસાબે અને જોખમે એમ કરવાનું રહેશે.' એટલી મૈત્રીપૂર્ણ ચેતવણી અને વાંચનારને આનંદ આવશે એની ખાતરી. (ન આવે તો? શુભેચ્છાઃ-)
Subscribe to:
Post Comments (Atom)
Gujarati world na mast head ni image mate me tamane compliments aapela, eva j compliments Originally fake mate pan aapava rahya. school-college days ni dhinga-masti ni yad apavatu kagal nu viman ane e pan news paper ni pasti nu!! maza padi... fake thrust of India, AP (Associated Photoshop), Silly-Con Valley, Our IT Chorus-pondent, Al Fake Bin News vagere pan moz karave 6e...
ReplyDeleteBahu j saras ane kaik hat ke blog che, saheb. Keep it up.
ReplyDelete